ФИНАЛНА КОНФЕРЕНЦИЈА: Промоција на предлог Закон за измени и дополнување на Законот за младинско учество и младински политики
На 23 декември 2024 година во хотел Парк во Скопје, Коалицијата на младински организации СЕГА организираше завршна конференција на која беа претставени предлог-измени на Законот за младинско учество и младински политики.
Националната конференција е завршна консултативна средба, дел од Младинските Консултации што Коалиција на младински организации СЕГА ги спроведува во партнерство со Националниот Младински Совет на Македонија и Сојузот за младинска работа.
На оваа конференција беа изложени предлозите кои произлегуваат од консултативниот процес, а кои се резултат на широката вклученост на младите, институциите и организациите кои се занимаваат со младински прашања.
Процесот за изменување на Законот започна со серија активности кои вклучуваа два Младински Кругови, осум регионални форуми и една Национална консултативна средба. Овие настани беа платформи за младите да ги изнесат своите ставови, предлози и потреби во однос на младинските политики.
Измените кои беа презентирани на конференцијата се однесуваат на реално остварување на правото на младите за младинско организирање и младинско учество, што е од суштинско значење за активно учество на младите во сите сфери на општественото живеење. Зоран Илиески, Извршен Директор на Коалиција СЕГА, изјави дека „овие измени ќе обезбедат поддршка за младинските организации и ќе ја зголемат улогата на младите во процесите на донесување на одлуки”.
Конференцијата заврши со презентација на финалниот нацрт на Законот за измени и дополнувања на Законот за младинско учество и младински политики. Овој нацрт текст беше драфтиран од правен експерт, а сите предложени измени и дополнувања се засновани на размислувањата и предлозите на младите и младинските организации. Следниот чекор е финализирање и доставување на овие измени до надлежните институции за понатамошна процедура.
Коалицијата СЕГА ќе продолжи да работи на поддршка на младите и нивната инклузија во сите сфери на општествениот живот.
Автор: Коалиција СЕГА