„Нема дилема дека добрата статистика е предуслов за добри одлуки и политики, коешто на централните банки им овозможува водење на добра монетарна и финансиска политика. Како што еволуираат економиите мора да еволуираат и статистиките“, подвлече гувернерката. Дејан Станков, в.д. директор на Државниот завод за статистика на Република Северна Македонија оцени дека мисијата на Заводот е да произведува точни, релеватни и непристрасни податоци за јавноста. Според Станков, официјалните статистики се клучен инструмент за транспарентоста и отчетноста на јавните политики. Мојмир Мрак, професор на Економски факултет на Универзитетот во Љубљана во своето излагање истакна дека добрата статистика е инфраструктура за нормален економски и социјален развој на секоја земја. Статистиката е основа за добра регулатива. Ако земјата не може да ги исполни условите од Европската комисија, парите не доаѓаат во земјата. Ако сакате да покажете реформи, мора да имате добри индикатори, а за тоа ви требаат податоци. Затоа податоците се исклучително важни“, оцени Мрак.

Мај Ериксон Готер, консултант во Државниот завод за статистика, нагласи дека потребно е статистичките власти да бидат независни од другите политички, регулаторни или управни тела и сектори, како и од приватните оператори за да се обезбеди кредибилитет на статистичките податоци, но и да се обезбедат соодветни ресурси. Драган Тевдовски, професор на Економскиот факултет при УКИМ, потенцираше дека ако сакаме да се намали корупцијата, треба работењето на институцииите  целосно да е отворено за јавноста, а сите договори и анекси да бидат објавени од страна на Бирото за јавни набавки.  Една од најсилните мерки против корупцијата е објавување на консолидиран биланс на состојба на јавниот сектор. Тевдовски зборуваше и за потребата од објавување на годишните даночни пријави како што е тоа случајот со Финска. Јоана Маџоска, економист во Светска Банка смета дека не можеме да имаме добри економски политики без добри макроекономски податоци. Таа истакна дека е потребна деполитизација на јавниот секгор, заменување на политичките вработувања со професионални вработувања, како и зајакнување на капацитетот на институциите и дигитализација. Благоја Пандовски, претседател на „Транспаренси интернешнал –Македонија“ ја појасни улогата на оваа невладина организација во борбата против корупцијата, додавајќи дека често корупцијата не се гони од страна на целиот синџир институции надлежни за тоа. Учесниците на сесијата ја истакнаа улогата на релевантни и точни податоци како предуслов за обезбедување на раст и развој на државата, но и пресудни во процесот на носење на јавни политики и носење на правилни одлуки од страна на граѓаните.