Медиумите за ЕУ: Тематски форуми низ цела Северна Македонија
Во рамките на проектот „Медиумите за ЕУ“, што го спроведуваат Евротинк, АЛДА и БИРЦ, низ сите осум административни плански региони на Северна Македонија се организираа тематски форуми, посветени на актуелните предизвици и можностите што ги нуди европската интеграција. Овие настани беа осмислени како платформа за соработка меѓу новинари, граѓански организации и експерти од различни области, со цел подобро разбирање на европските политики и нивното влијание врз локалните заедници.
Секој форум се фокусираше на специфични теми значајни за регионот во кој се одржуваше. Разговараше за потрошувачките права, слободното движење на работната сила, агрикултурата, правата на етничките заедници, образованието, транспортните политики, рибарството и животната средина. Настаните се реализираа во Скопје, Штип, Струмица, Куманово, Битола, Велес, Охрид и Тетово, привлекувајќи реномирани експерти, кои преку интерактивни дискусии ги споделија своите сознанија и идеи.
Транспортната политика беше во фокусот на форумот во Велес, каде учесниците истакнаа дека подобрата комуникација меѓу медиумите и локалните власти може да придонесе за поефикасно информирање на граѓаните. Се разговараше и за потребата од редовни средби меѓу новинарите и институциите, со цел подобро разбирање и пренесување на информациите за европските стандарди во транспортот.
Во Струмица, главна тема беше земјоделството и начинот на кој медиумите можат да помогнат во промоцијата на европските можности за финансирање. Учесниците дискутираа за важноста на соработката меѓу медиумите, граѓанскиот сектор и локалните власти во информирањето на земјоделците за достапните фондови и програмите што можат да им помогнат во развојот на нивните производни капацитети.
Рибарството и животната средина беа централни теми на форумот во Охрид. Говорниците посочија на потребата од подобро управување со природните ресурси и потенцијалот што го нудат европските фондови за оваа област. Посебен акцент беше ставен на прекуграничната соработка и улогата на медиумите во зголемувањето на јавната свест за заштита на екосистемите.
Прашањата поврзани со трудовите права беа во центарот на дебатата во Штип. Претставници од медиумите и граѓанските организации ги анализираа предизвиците што произлегуваат од емиграцијата на младите и недостигот на работна сила. Иако македонското законодавство во голема мера е усогласено со европските стандарди, остануваат проблеми во неговата имплементација. Разговорите се фокусираа на потребата од нови законски решенија за работни спорови и колективно договарање, како и на можностите за примена на позитивни европски практики во оваа област.
Образованието, културата и младинските политики беа тема на форумот во Битола. Дискусиите ја нагласија важноста на програмите како Еразмус+, кои можат значително да придонесат кон подобрување на образовниот систем и културниот развој. Преку интерактивни сесии, учесниците разменуваа мислења за тоа како медиумите можат да ја подобрат комуникацијата околу овие можности и да поттикнат поголемо учество на младите.
Проектот „Медиумите за ЕУ“ ја зајакна свеста и капацитетите на медиумите и граѓанскиот сектор во Северна Македонија, создавајќи простор за конструктивен дијалог меѓу новинарите, институциите и експертите. Преку овие форуми, беа идентификувани клучните предизвици, но и можностите за подобрување на информираноста за европските процеси. Заклучоците и препораките што произлегоа од дискусиите ќе служат како основа за идните политики и иницијативи насочени кон поуспешна интеграција на Северна Македонија во Европската Унија.